«O “coworking” é unha forma de traballo colaborador que permite reducir custos»

A Sociedade Cooperativa Libre Colibris España, fundada en 2011 en Albacete, inaugurou onte o seu centro de 'coworking', 'Espazo Tequio'. Trátase dun centro de traballo colaborador dirixido a autónomos, empresas, asociacións e pemes, entre outros. Ten como obxectivo ofrecer un espazo con todo o necesario para desenvolver un proxecto empresarial.

- ¿A que se dedica a Sociedade Cooperativa Libre Colibris España?

- A cooperativa é unha iniciativa liderada por profesionais autónomos de Albacete. A idea xurdiu durante un curso que houbo na Escola Oficial de Idiomas. O obxectivo que ten esta sociedade é propoñer unha alternativa dentro dun mercado laboral cada vez máis complicado, trátase de xestionar e coordinar proxectos colaboradores. A cooperativa naceu para atender a necesidade de que o mercado laboral xa non absorbía a man de obra e o que queremos facer é crear proxectos. A nosa cooperativa presta servizos de xestión de proxectos empresariais. O perfil de proxectos que podemos facer depende do perfil do colaborador, canto máis variado sexa o perfil do colaborador máis variedade de proxectos podemos abranguer.

- ¿En que proxectos están a traballar agora?

- Actualmente, polos socios que temos, estamos especializados en tecnoloxía, en consultoría para emprendedores e para pemes e unha asesoría medio ambiental. Por exemplo, ao principio de crearnos tiñamos unha oferta de servizos tecnolóxicos, entón temos xa páxinas webs, feitas de forma colaboradora, temos xestión documental, temos asesorías para pemes.

- ¿Cando se fundou a cooperativa e con cantos socios conta?

- Creouse a finais de 2011 e no momento actual está en proceso de consolidación. Somos oito socios aínda que agora vai haber unha nova apertura para que entren socios novos, serán catro ou cinco máis. Destes oito socios un é de Ciudad Real, un de Madrid e outro de Alicante, o resto somos de Albacete. A proposta da cooperativa é que sexa unha sociedade a nivel nacional, creouse cos estatutos nacionais.

- Unha das apostas que se fixo dende Colibris é a posta en marcha dun centro de 'coworking', 'Espazo Tequio'. ¿En que consiste este centro?

- Si, o 'coworking' é unha forma de cotraballo e ao noso centro chamámolo 'Espazo Tequio', é un oficina grande de traballo.

É un espazo físico que está dotado de mesas de traballo, sala de reunións, sala de eventos, Internet, unha sala de descanso con sofás, libros e revistas, e unha cociña equipada con cafeteira, frigorífico e microondas. Esta iniciativa particular diríxese a autónomos, empresas, pemes, asociacións... O obxectivo é ofrecer un espazo con todo o necesario para traballar e emprender, cunha estrutura que facilite sacar adiante o proxecto a un custo menor que se se alugase unha oficina individual e, á vez, incentivar a sinergía entre os colaboradores e usuarios do centro, de maneira que nalgún momento se poidan crear colaboracións que permitan completar un proxecto. Ao compartir o espazo xérase un intercambio de coñecementos, hai unha interacción.

- ¿Alguén se interesou xa por entrar en 'Espazo Tequio'?

- Si xa somos seis socios e, ademais, estamos a falar con outros centros de 'coworking' de España para asociarnos e formar unha rede de oficinas co obxectivo de que un socio noso, se vai a outra cidade, poida usar esas instalacións soamente coa cota que paga aquí, e viceversa. Agora estamos en negociacións con dous centros de Valencia. E a cota a pagar depende do tipo de aluguer que se queira: por un mes, por tres meses, por días, por horas... esta flexibilidade responde a querer atender as necesidades do público, as necesidades que teña á hora de desenvolver o seu proxecto.

- ¿Teñen algún proxecto funcionando xa dentro do centro?

- Hai un curso de formación que elaborou un colaborador, é un curso de educación medio ambiental. En 'Espazo Tequio' queremos ofrecer tamén charlas, eventos e talleres. É un centro de traballo colaborador e as posibilidades de colaborar son moitas: unha delas é tamén que os socios ofrezan conferencias e que a nosa relación non sexa soamente a de alugar a sala. Pero se alguén soamente quere alugala tamén ten esa opción.

A rede Eusumo de fomento do cooperativismo conta xa con 22 puntos de asesoramento en Galicia

A rede Eusumo de fomento do cooperativismo, promovida e creada pola Consellería de Traballo e Benestar, conta xa con 22 puntos de asesoramento en Galicia. Estes centros e oficinas de fomento cooperativo foron postos en marcha mediante a colaboración con distintas entidades e agrupacións de concellos.

O director xeral de Traballo e Economía Social, Odilo Martiñá, inaugurou no día de onte en Santiago a xornada “Cooperar, unha opción con futuro”. Na súa intervención, centrouse na creación da rede Eusumo, o primeiro entramado específico de servizos de promoción e asesoramento destinado á economía social na comunidade autónoma. Neste sentido, lembrou que en novembro aprobouse o decreto que permite consolidar e ampliar este programa, ao tempo que lle outorga un carácter estable.

Os principais obxectivos desta rede son a posta en marcha de novos proxectos cooperativos, como motores da creación de emprego; e, por outra banda, a consolidación das empresas de economía social existentes mediante a mellora da súa competitividade.

Para acadar estas metas, a rede ocúpase de achegar información e asesoramento especializado a desempregados, cooperativistas, emprendedores e cidadanía en xeral, prestando especial atención aos procesos de acompañamento de proxectos.

As entidades colaboradoras da rede son, e serán, aquelas que teñan interese no desenvolvemento da economía social, no apoio ao emprendemento ou no desenvolvemento local, e que poñan a disposición da rede Eusumo algún dos medios e recursos dos que dispoñan, tales como infraestruturas e servizos.

Poderán ser entidades colaboradoras desta Rede as administracións públicas; as asociacións de cooperativas e de sociedades laborais; as sociedades cooperativas galegas; as fundacións e asociacións; as universidades -a través dos seus centros colaboradores-; as cámaras de comercio e outras entidades sen ánimo de lucro.

Unha das características do modelo de funcionamento da Rede é o feito de que explora no territorio, tratando de atopar espazos de oportunidade. Este traballo realízase a partir de entrevistas e contactos con diferentes axentes e coa conformación de grupos de traballo. Nestes grupos analízanse as potencialidades do sector, preséntanse as fórmulas da economía social para apreciar en que medida poden adaptarse ao mesmo e realízase formación práctica en habilidades de traballo en equipo e participación.

Os servizos sociais e a atención a persoas en situación de dependencia son un dos eidos potenciais de creación de emprego en Galicia. En liña coa potenciación destes sectores, a Rede Eusumo ofrece un apoio específico para fomentar empresas de economía social nos mesmos.

Proba de que -como é o lema da xornada- as cooperativas son unha “opción con futuro” é que ao longo desta lexislatura déronse de alta en Galicia 168 novas cooperativas, cun total de 4.106 socios. Isto supón un incremento do 75% en relación coas cooperativas creadas na lexislatura anterior, e un incremento do 109% en relación co número de socios.

Xornada sobre cooperativas

Ademais da rede Eusumo, as xornadas que se celebraron na pasada xornada abordaron outros temas de interese no eido cooperativo. Entre outros asuntos, estase a tratar a dinamización do emprego e o impulso á internacionalización, a través de proxectos como o Coopera +, da Xunta de Galicia.

Outras ponencias e mesas técnicas están a centrarse en temas como as oportunidades cooperativas fronte á crise; a internacionalización, tamén para as pequenas empresas; ou ferramentas para a comercialización a través de aplicacións TIC para o fomento do e-commerce.

Na seguinte imaxe podedes ver a 6 dos técnicos das 22 Oficinas de Fomento Cooperativo repartidas pola Comunidade Autónoma.