Poucos exemplos pode haber máis paradigmáticos que o da
familia Gómez Rodríguez para comprender como é A Limia. A bisbarra agrogandeira
máis importante de Galicia segue viva malia a crise e outras presións externas
grazas á teimosía e o esforzo de personaxes como Celso Gómez Valencia. Esa
paixón pola súa terra -á vez orixe e sustento dos que a habitan- transmitiuna á
perfección aos seus catro fillos, todos implicados en traballos relacionados co
campo.
O cabeza de familia abriu camiño nos anos oitenta, cando
contaba con pouco máis de 25 anos. Foi cofundador da cooperativa de vacas
Antelana e, practicamente ao mesmo tempo, creou a súa propia explotación de
porcos, bautizada como A Curuxeira. Comezou con 80 nais en ciclo completo e con
moi poucos medios. «Agora témoo todo informatizado, pero entón empecei sen luz
nin medios técnicos ningúns», conta Celso, que malia todo logrou que o negocio
crecese e crecese. En 1986 xa tiña 150 nais, en 1990 alcanzou as 250, en 1996
as 500 e, finalmente, no 2007 chegou ás 800. Para facerse unha idea, a súa
granxa consume cada día 17.000 quilos de penso, ten sete empregados e produce
18.000 porcos ao ano.
