Pósitos de Muros-Noia sentan as bases para centralizar as vendas mediante a creación dunha cooperativa

A delicada situación pola que atravesa o sector pesqueiro obriga a buscar alternativas para revalorizar os prezos do produto e, precisamente, niso traballan dende hai tempo confrarías de Muros e Noia, co respaldo do Grupo de Acción Costeira 4 (GAC 4). Os pósitos sentaron as bases para centralizar as vendas mediante a creación dunha plataforma on-line, unha experiencia piloto que arrancará coa comercialización do polbo.

A iniciativa de concentrar as poxas comezou a xerarse tras a realización dun estudo sobre a viabilidade do sector pesqueiro encargado polo GAC 4. No informe suxeríase, segundo indicou a xerente, Manuela Oviedo, a creación dunha cooperativa de vendas.

A Cooperativa Sanitaria ourensana, CO.SA.GA, ofrece tratamentos de recuperación cardíaca a parados

A clínica Centrokorazón, Cendisa e a Cooperativa Sanitaria Co.Sa.Ga. uníronse en Ourense para ofrecer seis prazas gratuítas para o programa de Rehabilitación Cardíaca a media ducia de persoas que sufrisen un infarto, unha cirurxía cardíaca ou calquera outro evento cardiovascular no último ano e se encontren no paro. 

As persoas que queiran aproveitarse desta campaña, que se pon en marcha coincidindo coa celebración do Día Europeo de Prevención Cardiovascular, terán que poñerse en contacto coa clínica antes do 29 de marzo. 

O programa que se ofrece comezará o 1 de abril e inclúe 18 sesións de tratamento, cun protocolo de exercicio físico estruturado polo cardiólogo e o especialista en exercicio de rehabilitación cardíaca, apoio psicológicio e educación alimentaria e sanitaria para controlar os factores de risco.

A Cooperativa Coren lanzará en maio un xamón curado procedente de porcos alimentados a base de castañas

O grupo cooperativo galego Coren anunciou que o próximo mes de maio comezará a venda dun xamón curado procedente de porcos que foron alimentados con castañas. O produto encravarase dentro da súa gama Selecta.

Este xamón procede de porcos de raza seleccionada e alimentados con castañas, dando unha carne máis substanciosa e saborosa, segundo indicaba Coren hai un ano cando presentou a carne destes animais. Un ano despois, tras o período de curación, chegarán ao mercado os xamóns curados.

O produto xa está a resultar interesante para numerosos importadores tanto da Unión Europea coma doutros países como Corea do Sur ou Xapón. Neste último país valórase bastante a alimentación a base de castañas e nel xa se está a comercializar a carne fresca dos porcos con este tipo de alimentación.