Medio centenar de entidades xa colaboran coa rede Eusumo que promove traballo para fomentar o cooperativismo

A Cámara de Comercio de Tui forma parte desde hoxe da Rede Eusumo que promove a Consellería de Traballo e Benestar para fomentar en Galicia o cooperativismo. A titular do departamento autonómico, Beatriz Mato, asinou hoxe en Tui o convenio de colaboración con esta entidade.

A conselleira resaltou que coa adhesión da Cámara de Tui a esta rede xa son medio centenar as entidades da Comunidade que colaboran con esta iniciativa, entre os que destacan concellos, deputacións, oficinas de fomento cooperativo, asociacións, fundacións, organismos vinculados ao emprendemento e universidades.

O departamento autonómico puxo en marcha en 2012 o proxecto Eusumo como unha experiencia piloto e, tras o éxito acadado e fixar as súas bases mediante un decreto, que supuxo a súa consolidación, o Goberno galego está este ano a potencialo “de forma decidida”.

Mato resaltou que ata o momento 27 cooperativas teñen nacido ao abeiro desta rede, o que posibilitou a creación de máis de 100 empregos directos. “Esta rede constitúe unha ferramenta esencial para o desenvolvemento presente e futuro da economía social en Galicia”, apuntou a conselleira, ao tempo que sinalou a importancia de difundir esta fórmula empresarial. Afirmou, neste senso, que está a demostrar nos últimos anos “unha extraordinaria” resistencia fronte á crise económica e ten achegado novas posibilidades de negocio e emprendemento, especialmente no eido social.

Engadiu, así mesmo, que o cooperativismo dá prioridade ás persoas e ás súas necesidades por riba de calquera outra consideración e axuda a conservar e crear postos de traballo, ao tempo que contribúe ao equilibrio territorial.

Na actualidade, Galicia conta con preto de 1.200 cooperativas activas que agrupan a 90.000 socios. Só no ano 2012 creáronse 58 cooperativas na Comunidade autónoma e outras 33 nos primeiros meses deste ano.

Ademais da Rede Eusumo, Mato lembrou outras iniciativas postas en marcha pola Consellería de Traballo e Benestar para promover o cooperativismo como é o programa Coopera Máis para articular medidas que contribúan ao fomento e consolidación das cooperativas na eurorrexión Galicia-Norte de Portugal.

En 2011, modificouse a Lei do Cooperativismo que estaba vixente desde 1998, adaptándoa aos tempos actuais e tendo sempre como obxectivo último facilitar e promover a creación de novas cooperativas.

E este ano crearase a Marca Coopera, un distintivo que contribuirá a dar visibilidade a aquelas cooperativas que estean a realizar unha boa xestión. Para este ano 2013, o departamento autonómico investirá máis de 4 millóns de euros á economía social , dos que 870.000 euros están destinados á Rede Eusumo.

Horsal e Hortumia demostran a calidade da súa horta

As dúas cooperativas da horta de Cambados, Horsal e Hortumia, organizaron onte unha xornada para poñer en valor os produtos da horta. Dar a coñecer a calidade dos seus cultivos e ensinar formas diferentes de cociñalos é o obxectivo desta iniciativa que xa se celebrou o pasado ano cun notable éxito de público. Dúas conferencias e unha exhibición de cociña protagonizaron o programa de actos desta edición.

O salón de congresos e exposicións de José Peña acolleu onte as dúas charlas, que versaron sobre o cooperativismo. Estaban destinadas a mostrar ao público en xeral o traballo do campo, co obxectivo de que moitos veciños poidan encontrar neste sector unha saída laboral. Unha tarefa na que as dúas cooperativas levan xa máis dun ano traballando, co fin de poder dispoñer de maior cantidade de produto para atender a todos os mercados.

A segunda parte desta xornada consistiu nunha exhibición de cociña a cargo e Avó Daporta, do restaurante do mesmo nome, e Antonio Botana, do Pandemonium. O primeiro deles preparou verduras en tempura, unha grellada de verduras e unha esferas de tomates. Botana, en cambio, optou por unha emulsión de pemento de Padrón con polbo e xamón e por unha crema de tomates verdes con bonito de Burela en sal. Ambos os dous cociñeiros destacaron a calidade dos produtos que se cultivan na horta do Salnés e animaron os consumidores a comprobar, antes de comprar, a orixe do que cociñan. Todos os presentes deron boa conta das porcións elaboradas por estes dous cociñeiros cambadeses.

fonte: La Voz de Galicia

A cooperativa da Rúa dá a probar o seu novo escumoso

Os máis de 200 amantes dos vehículos clásicos que participaron na concentración da Rúa tiveron o privilexio de ser os primeiros en degustar o escumoso que, con uvas da variedade godello, elabora a Adega Cooperativa Virxe das Viñas para comezar a conmemorar o seu medio século de vida, que cumpre en xullo de 2014.

Chegaron en Ferrari, Austin, Porsche ou Seat 1.500, así como noutros moitos modelos, incluídos as motos Montesa e un autobúsPegaso. Utilizaron 124 vehículos, que na súa maioría partiron doBierzo, Lemos, Ourense, Portugal ou Verín. Eles foron os afortunados que puideron saborear as primeiras botellas que abriu a adega. A expedición foi organizada polo Motor Club Rúa, que preside SantiagoÁlvarez Rodríguez, quen lamentou a pobre resposta dos valdeorreses afeccionados aos coches de época, que tamén os hai.

Durante a degustación, o enólogo da adega cooperativa, Julio Ricarte Mateu, resumiu os plans de Virxe das Viñas. Pasan por elaborar 1.004 botellas dun escumoso preparado coa única finalidade de celebrar o medio século de vida que cumprirá en xullo de 2014. Os 630 socios que continúan activos saborearán a gran maioría dun produto creado para premiar a súa fidelidade. Tamén estarán á venda, aínda que serán as menos, pois apenas alcanzarán os dous centenares. En todo caso, aínda hai que esperar a decembro para valorar se o resultado acompañou os esforzos da adega, pois ese mes foi o elixido para iniciar a súa distribución. A proba de onte foi forzada. Buscou premiar a visita dos vehículos clásicos, unha cita, que foi incluída no programa da XVI Feira do Viño de Valdeorras. 'Quixemos dalos a probar algo distinto', dixo Julio Ricarte.