Traballo promove accións para fomentar a intercooperación como clave para reforzar o modelo cooperativo fronte á crise

A Consellería de Traballo e Benestar está a promover diferentes accións para fomentar a intercooperación como clave para o futuro do movemento cooperativo co obxectivo de seguir a reforzar este modelo empresarial fronte á crise.

Deste xeito, o director xeral de Traballo e Economía Social, Odilo Martiñá, participou hoxe en Cambados nunha xornada de intercooperación que desenvolven as cooperativas Martín Códax e O Cable Inglés.

Neste senso, o director xeral de Traballo e Economía Social destacou que en Galicia existen un total de 1.194 cooperativas que agrupan a máis de 90.158 socios e crean preto de 19.000 postos de traballo, entre directos e indirectos, o que supón preto dun 2% da poboación ocupada.

O tecido cooperativo galego está a rexistrar un crecemento significativo ano a ano. Desde 2010 ata este mes de xuño constituíronse un total de 179 cooperativas. Obsérvase ademais un lixeiro incremento entre os diferentes períodos anuais. En 2010 creáronse 42; en 2011 foron 48; en 2012 rexistráronse 58 novas altas; e no primeiro semestre do 2013 xa se contabilizaron 33 novas empresas desta índole. As provincias da Coruña e Pontevedra son as que presentan maior presenza de sociedades cooperativas, en consonancia co seu maior dinamismo empresarial.

“Os datos avalan que o cooperativismo é unha fórmula para resistir á crise, xa que fomentan o emprendemento e preservan os postos de traballo, ao tempo que buscan tamén un equilibrio territorial”, apuntou Martiñá.

Orzamento 2013

Así mesmo, afirmou que o orzamento do Goberno galego neste eido volve a superar en 2013 os 4 millóns de euros e fixo fincapé nos programas e iniciativas pioneiras postas en marcha polo departamento autonómico para dar apoio e cobertura a todas as persoas e proxectos que aposten por esta fórmula empresarial.

Destacou, entre outras actuacións, a Rede Eusumo de asesoramento en economía social, que se puxo en marcha en 2012 e que, tras fixar as súas bases mediante un decreto, estase a fomentar este ano “de forma decidida”, segundo asegurou.

Lembrou, así mesmo, que a Xunta modificou a Lei do Cooperativismo que estaba vixente desde 1998 para facilitar e promover a creación de novos proxectos e puxo en marcha o programa Coopera Máis para articular medidas que contribúan ao fomento e consolidación das cooperativas na eurorrexión Galicia-Norte de Portugal.

Por último, Martiñá avanzou que no último trimestre deste ano poranse en marcha a marca Coopera, un distintivo para impulsar esta fórmula, os seus produtos e servizos. “O obxectivo que se vai perseguir con esta iniciativa é dar visibilidade a aquelas cooperativas que estean a realizar unha boa xestión”, resaltou.

fonte: Novas Xunta