No día de hoxe publícase no DOG (Diario Oficial
de Galicia) nº 226 o Decreto que regula a creación da Rede Eusumo para o
fomento do Cooperativismo e a Economía Social e se regula o seu funcionamento.
Co impulso do máximo órgano de promoción do
cooperativismo na Comunidade Autónoma, o Consello Galego de Cooperativas, e co
apoio explícito de asociacións representativas e de fundacións de base
cooperativa, a Xunta de Galicia dá forma ao empeño compartido de promover a
economía social mediante a creación da Rede Eusumo para o fomento do
cooperativismo e a economía social.
Con esta Rede preténdese estender o labor de
promoción con dous obxectivos fundamentais: por unha parte, a posta en marcha
de novos proxectos cooperativos como motores de creación de emprego e, por
outra, a consolidación das empresas de economía social existentes mediante a
mellora da súa competitividade, achegando información e asesoramento
especializado a desempregados, cooperativistas, emprendedores e cidadanía en
xeral, e prestando especial atención aos procesos de seguimento de proxectos.
Enmárcase, tamén como obxectivo da Rede, facer
chegar aos cidadáns os diferentes recursos e infraestruturas de institucións,
entidades ou organizacións con interese en adherirse á Rede.
Esta Rede estará formada pola Xunta de Galicia
e polas entidades colaboradoras que poñan a disposición das actividades de
fomento os seus medios e recursos, asinándose para tal efecto convenios de
colaboración entre a consellería competente en materia de traballo e as
devanditas entidades.
A Rede contará con centros que terán como
finalidade a realización das actividades, especialmente a información e
sensibilización do conxunto da sociedade. O seu número garantirá como mínimo
que o rango de actuación abranga todo o territorio galego, fomentando, ademais,
a través de instrumentos específicos, a colaboración con zonas
transfronteirizas.
No hay comentarios:
Publicar un comentario