A exposición que está a promover a Consellería de Traballo e
Benestar para divulgar e impulsar o cooperativismo na comunidade autónoma chega
hoxe á localidade ourensá de Celanova. A mostra estará situada ata o próximo 1
de marzo no auditorio municipal Ilduara, emprazado na rúa do Cercado, s/n.
A exposición “Descubre as cooperativas” percorrerá un total
de 37 localidades galegas e intégrase dentro da Rede Eusumo, unha estratexia de
cooperación entre os axentes públicos e asociativos orientada ao fomento do
cooperativismo e economía social como fórmula de xeración de emprego.
Este proxecto ten como finalidade presentar as
potencialidades e solucións que ofrecen as cooperativas, que están a demostrar
a súa capacidade de manter e crear empregos na actual crise económica.
Así, na mostra faise un percorrido polos elementos clave do
modelo cooperativo: que son, que tipos hai, como funcionan, cales son os
valores que defenden, que pasos dar para crealas ou que apoios existen.
Os visitantes poderán achegarse deste xeito ao
cooperativismo agrario, ao autoemprego cooperativo, ou mesmo comprobar se teñen
“madeira de cooperativistas” a través dunha exposición marcada polo seu
carácter interactivo e dinámico.
Por outra banda, é preciso lembrar que a Oficina de Fomento
Cooperativo da Mancomunidade de Celanova, co apoio da Dirección Xeral de
Traballo e Economía Social da Consellería de Traballo e Benestar a través da
Subdirección Xeral de Cooperativas e Economía Social, e co financiamento do
Fondo Social Europeo, desenvolve unha forte actividade de difusión do
cooperativismo, no marco da Rede Eusumo, no ámbito dos concellos de A Merca,
Cartelle, Celanova, Gomesende, Pontedeva, Quintela de Leirado, Ramirás e Verea.
No contexto de crise económica, as cooperativas destrúen
menos empregos que outras tipoloxías empresariais e, ademais, o seu ritmo de
creación acelérase en contextos de dificultade económica xa que ofrecen unha
alternativa de autoemprego colectivo para aqueles traballadores e traballadoras
que teñen unha idea empresarial viable e que queren levala a cabo cuns valores
de igualdade, axuda mutua e responsabilidade compartida.
No hay comentarios:
Publicar un comentario