Catro sociedades do Grupo Coren superan os mil millóns de
euros de facturación anual e seguen crecendo en plena crise económica - Só dúas
firmas ourensanas inclúense entre as trinta principais de Galicia.
A industria agroalimentaria converteuse no motor económico
da provincia ao rexistrar en plena crise económica uns ingresos de explotación
moi afastados dos que xera a construción. E é a cooperativa ourensana Coren a
que aglutina os mellores resultados económicos, crecendo mesmo nun contexto
económico de contracción, aumento do paro e peche de compañías.
O informe socioeconómico que elabora anualmente o Consorcio
Zona Franca de Vigo coloca á sociedade cooperativa no posto número 13 do
ranking das 20.000 sociedades galegas. Cunha facturación de 534,5 millóns de
euros no ano 2011 e 852 postos de traballo, a produtora cárnica é tamén a
primeira empresa ourensana nese exercicio, desbancando á construtora Copasa que
ostentaba ese posto o ano anterior. Segundo os últimos datos recollidos no
informe Ardán 2013, esta SA de Obras e Servizos especializada en enxeñaría
civil e unha das grandes adxudicatarias da AVE, facturou 292,9 millóns de euros
(50,7 menos que en 2010). O seu equipo, de 562 traballadores, viuse reducida no
período de análise en 79 contratos.
Pero ademais, tres empresas de Coren están entre as únicas
oito ourensanas que superan os 100 millóns de euros en facturación anual, e
entre as tres suman 962 millóns en vendas en 2011, que é o ano de referencia para
a elaboración do informe Ardán 2013. Ademais da empresa Cooperativas Ourensanas
SCG que lidera o ranking, Coren achega a esta conta global de resultados Galega
de Alimentación SA, con sede social no polígono de San Cibrao, que se encarga
do comercio por xunto de comestibles. Ocupa o terceiro posto por detrás de
Copasa, con 219,8 millóns de euros facturados e 97 empregos. No sexto posto
sitúase a produtora de pensos Coren Agroindustrial, con planta en Santa Cruz de
Arrabaldo e un equipo de 82 persoas. No ano de estudo realizou vendas por 135,6
millóns.
Unha das plantas de procesado de Coren, en Santa Cruz de
Arrabaldo.
Cunha facturación por debaixo dos 100 millóns encóntrase
unha cuarta empresa do grupo, Subministracións Coren SA, dedicada tamén á
produción de alimentos e materia prima para granxas, que ingresou 45,9 millóns
de euros e deu emprego a 83 persoas. Esta firma ten o selo de "xeradora de
riqueza" e os ingresos que achega ao conxunto eleva a 1.007 millóns de
euros a facturación de Coren en 2011. Este volume de ingresos sitúa o grupo
entre as primeiras empresas de Galicia.
Coloniais da Cruz, Aceites Abril e Ignacio de las Cuevas,
nos postos 9, 10 e 12 respectivamente, achegan tamén importantes ingresos no
sector da agroalimentación. A primeira, dedicada ao comercio almacenista con
sede en Valdeorras, facturou 94 millóns e ten 501 traballadores. A produtora de
aceite de oliva realizou vendas por 85,8 millóns e conta con 60 empregos,
mentres que o Grupo Covas, con 64 millóns, sostén un equipo de 213 persoas.
Copasa é, xunto con Coren, a única referencia ourensana
entre as 30 principais empresas galegas, neste caso, no posto número 20. Non é,
non obstante, a única firma do sector da construción que figura entre as
grandes de Ourense. En sétimo lugar está Obras, Asfaltos e Camiños SA, dedicada
á construción de estradas e autoestradas, que xerou ingresos por 118,5 millóns
de euros e sostén un equipo de 177 traballadores. A pesar de que a facturación
non variou respecto ao exercicio anterior, esta empresa prescindiu durante 2011
de 51 traballadores.
No terceiro e cuarto posto do ranking das sociedades con
maior volume de ingresos sitúase o sector téxtil coas dúas grandes Sociedade
Textil Lonia e Adolfo Domínguez. Entre as dúas suman 321,5 millóns de euros en
vendas, sendo a primeira a que máis ingresos xera, con 184,1 millóns e a pesar
de contar cun equipo inferior á de Adolfo Domínguez. En todo caso, esta análise
recollida no informe Ardán non é de todo fiable xa que a última auditoría
realizada pola sociedade que agrupa as firmas Purificación García e CH Carolina
Herrera é de 2009, mentres que o deseñador ourensano actualizou os seus datos.
O informe reflicte unha caída na facturación de Adolfo Domínguez de case 20
millóns e unha drástica redución do equipo, que nun só exercicio perdeu 300
traballadores. Aínda así, o empresario mantense entre as primeiras compañías da
provincia cunha facturación de 137,3 millóns e unha bolsa de 1.766 empregos.
No hay comentarios:
Publicar un comentario