O emprendemento no ámbito da economía social (cooperativas,
fundacións, ONG, etcétera) e a seguridade informática son as novidades na
oferta de cursos da Universidade para este verán. A matrícula permanecerá
aberta dende o 16 de maio ata 10 días antes do inicio de cada programa e as
taxas, que oscilan entre os 20 e os 85 euros, contemplan descontos do 50% e o
25% para estudantes e membros da comunidade universitaria, respectivamente.
O curso sobre emprendemento social desenvolverase a finais
de setembro na Facultade de Económicas e pretende espertar "inquietude e
iniciativas" empresariais entre os estudantes e demais cidadáns.
As clases serán impartidas por profesores da Universidade,
así como por representantes da Administración e de iniciativas vinculadas á
economía social, onde a rendibilidade está unida á responsabilidade social e a
solidariedade.
O Edificio Fundición acollerá en xuño un curso sobre
seguridade informática que contará con expertos do ámbito da investigación e a
avogacía. Tamén asistirán o maxistrado da Audiencia Nacional Eloy Velasco e o
profesor da Universidade de Cádiz e exdirector da Axencia de Protección de
Datos de Madrid, Antonio Troncoso.
O curso pretende informar os alumnos sobre os principais
instrumentos tecnolóxicos e legais para protexer a información e a privacidade
na rede. E ademais busca formar futuros especialistas.
A oferta estival complétase cos cursos sobre xestión de
explotacións acuícolas, urxencias cardiovasculares, primeiros auxilios,
termalismo -que se desenvolverá en balnearios de Ourense e Lugo-, desigualdade
e patrimonio natural e cultural do Bierzo, que terá lugar, na bisbarra leonesa.
No hay comentarios:
Publicar un comentario