As dificultades para encontrar unha oportunidade no mercado
de emprego levan cada vez máis xente a optar por opcións menos habituais. O
cooperativismo é unha das que gaña máis adeptos e que xa dá traballo ao 2 por
cento da poboación. Unha vintena de veciños da bisbarra aprendión onte en
Moraña como ingresar nesa pequena porcentaxe.
Din que a unión fai a forza e dende a Xunta de Galicia tamén
pretenden que esta sexa unha das solucións polas que os cidadáns terán que
optar para encontrar un emprego. Así se apuntou en Moraña durante un seminario
sobre autoemprego que ao longo deste ano se desenvolveu por diversos puntos da
xeografía autonómica.
Esta colaboración que se propoñen os gobernantes para que
sexan os propios desempregados os que teñan que poñer remedio ao
desesperanzador mercado laboral é algo por que cada vez opta máis xente. De
feito, en Galicia xa hai 90.000 traballadores vinculados ao cooperativismo.
Durante o curso de 10 horas que se desenvolveu na casa de cultura
morañesa, os asistentes puideron escoitar os argumentos que dende a Consellería
de Traballo e Benestar Social se dan para esta fórmula de emprendimiento
profesional. "En relación a outras tipoloxías empresariais, as
cooperativas destrúen menos emprego, xa que se prima ás persoas e adóptanse
outro tipo de medidas de flexibilidade ao mercado" "para evitar a
destrución de postos de traballo", apuntan dende este departamento
autonómico.
A vintena de inscritos en Moraña interesouse pola
posibilidade de pasar a formar parte dun colectivo que por agora supón o dous
por cento da poboación ocupada. En Galicia existen 1.152 cooperativas. Un dato
que dende o Executivo autonómico queren aumentar. Algo para o que puxeron en
marcha estes talleres que concluíron onte en Moraña. A iniciativa, que se
enmarca dentro do programa europeo 'Coopera + ' desenvolveuse tamén en Vigo,
Lugo, Ordes, Boiro, Melide e Abegondo.
No hay comentarios:
Publicar un comentario