A cooperativa O Val prevé duplicar a súa produción de tomate negro

Se hai un ano presentaban o anuncio de que ían sacar ao mercado a primeira produción de tomate negro de Santiago, a iniciativa tivo tal éxito que a Cooperativa do Campo Galego do Val prevé este ano duplicar a produción. Segundo explican dende a entidade agraria, o ano pasado venderon preto de 18.000 bandexas desta hortaliza (cada bandexa contén uns 650 gramos de tomates), e este ano prevén roldar a comercialización de 34.000 bolsas.

A cooperativa iniciou este plan piloto en colaboración con Costa Noroeste, e este é o terceiro verán que se desenvolve. A iniciativa enmárcase no plan Novos Horizontes, financiados con fondos europeos e promovido polo Ministerio de Agricultura. O primeiro ano non puideron comercializar a produción debido a que se xeraron cantidades pequenas do produto que se destinou a degustacións. O ano pasado a cooperativa presentou oficialmente a iniciativa, aínda que o tempo irregular provocou que a campaña fose menor da esperada. Esta edición a entidade espera duplicar a produción, non obstante tiveron que atrasar o inicio das vendas, que se atrasará ata a semana que vén.

A entidade agrícola comercializa este tomate negro a través do propio supermercado da cooperativa e dúas grandes plataformas, Alcampo e Gadis.

Ademais, esta hortaliza, xunto co produto estrela da cooperativa, o pemento do Couto, serán as protagonistas dunhas xornadas gastronómicas sobre produtos locais organizadas conxuntamente polo Concello de Narón e a cooperativa, que arrancarán cun encontro de bloggers gastronómicos internacionais o día 6 de xullo.