En dous anos a Cooperativa Virxe das Viñas venderá o 25% da súa produción no extranxeiro

Hai uns meses o case medio século da cooperativa Virxe dás Viñas sufriu un repentino empuxón. Unha das súas criaturas, o Rua, apareceu con 90 puntos sobre 100 na prestixiosa guía Parker, chamada a pontificar sobre a sempre complexa división entre viños bos e prescindibles.

O feito diferenciador era que o citado caldo da adega valdeorresa se lanzaba á fama cun prezo case tan irrisorio como 1,90 euros a botella. "A valoración da guía supuxo que un traballo que tiñamos para dez anos o adiantamos a cinco", recorda Julio Ricarte, director de Virxe dás Viñas. En resumo: a produción anda nas 450.000 botellas. A lombeirada de popularidade axudou "a que a xente coñeza nosos viños, aínda que nos non traballamos para ningún tipo de guía, senón para o consumidor final", advirte Ricarte.

Ademais do recoñecido Rua, a cooperativa ten outras marcas como Marquesiño e Pingadelo, con prezos que van dende 1,90 a 22 euros. Con esas divisas quere seguir gañando cota de mercado, sobre todo no estranxeiro. En Galicia e o resto de comunidades os viños da adega da Rúa son coñecidos razoablemente e o crecemento ten que chegar da internacionalización. Países de gustos tan dispares como Alemaña, Inglaterra, Xapón, China ou Estados Unidos reciben xa notables cantidades de viño desta cooperativa. De cada cen litros véndense fóra xa vinte, unha cifra a bater. Xullo Ricarte Mateu avanza que "alcanzar o 25% de exportación é noso obxectivo", unha porcentaxe que esperan alcanzar á volta de dous anos.

A empresa puido experimentar en carne propia que exportar non é doado. O director matiza que é complicado e lento porque a estrutura que temos non nos permite chegar directamente a eses mercados, temos que ir gañando clientes a través da nosa presenza en feiras". Por outra parte, os mercados receptores "estudan moi ben o produto antes de compralo e hai que esperar como mínimo entre catro e seis anos para ver se calla. Mellorar os indicadores de exportación é o reto principal pero, en momentos tan complicados como o actual, "tamén queremos consolidarnos moito máis no mercado nacional e exterior", di o director de Virxe dás Viñas. Apuntalar esa posición dependerá do seu propósito de facer "viños cada vez máis selectos, con viñedos que van dar viños de calidade media alta," segundo Ricarte.

COOPERATIVISMO

Forman parte da adega 850 cooperativistas, pequenos viticultores que teñen no cultivo da viña un complemento económico, pero raras veces é a súa actividade principal. Entre outras cousas, porque a explotación media non supera os 3.500 metros cadrados. Ricarte defende o modelo cooperativista porque "o produto vai directamente ao consumidor, evitando moitos intermediarios, evitando especuladores" pero tamén porque o cooperativista se implica moito máis na empresa e se a empresa funciona ben, eles funcionan ben porque tamén é a súa empresa".

A filosofía da adega "é coller todas as uvas dos socios, de todas as calidades, para comercializalas, sinala o director, quen recorda que "o socio nunca queda sen comercializar a súa produción, pase o que pase nesa colleita". Virxe dás Viñas recolle a materia prima nunhas 350 hectáreas de viñedo e a adega ocupa unha hectárea, mentres que 8.000 metros cadrados desa superficie están construídos. A capacidade da propia adega é de 8,5 millóns de litros, dez millóns de quilos de uva, aínda que actualmente (dependendo da colleita) a produción oscila entre 1,6 e 1,8 millóns. Polo que respecta á súa facturación, a cooperativa chega aos 2,2 millóns de euros anuais.