O alcalde de Lalín, José Crespo, traballa nun proxecto para a renovación do agro que pasa por impulsar os cultivos e producións ecolóxicas. Os chamados alimentos "bio" teñen cada vez un nicho de mercado máis amplo, sobre todo en restauración e en consumidores que priman a calidade ao prezo dos alimentos. O plan do mandatario pasa por impulsar estes cultivos -horta sobre todo- pero sen descartar a produción de animais como porcos ou aves para lograr que a capital dezana poida converterse a medio ou longo prazo nunha despensa de alimentos ecolóxicos que abasteza a mercados e consumidores.
O proxecto conta coa colaboración da Fundación Galicia Verde que dirixe Enrique Banet e que ten a súa sede na parroquia deLeboso (Forcarei). O coordinador desta sociedade e Crespo mantiveron antonte unha reunión para pergeñar os primeiros detalles dunha iniciativa encamiñada á recuperación e potenciación do campo e que algunhas explotacións poidan ter nestes cultivos un complemento á economía familiar. O escenario cambiante nos prezos do leite e a desaparición das cotas supón un momento clave para a busca de alternativas para un sector en permanente crise.
Neste sentido, a proposta inicial, que aínda deberá ser madurada, está pensada para aquelas explotacións cunha base territorial inferior ás 10 hectáreas.
A irrupción da agricultura ecolóxica tamén tivo resposta en Lalín. Mozos, sobre todo, crearon cooperativas ou empresas que dende hai un par de anos comercializan produtos sobre todo de horta. Os seus consumidores -as producións non son moi elevadas- adoitan ser veciños da zona, pero tamén os hai que venden as súas hortalizas de tempada noutras cidades como Santiago. A Praza de Abastos, co proxecto A Hortiña dá Praza ou unha tenda específica destes produtos, son dous exemplos das potencialidades que teñen os alimentos "bio" na zona. O interese do consumidor por estes alimentos aínda non está ao nivel doutros países, pero o diferencial de calidade é un argumento de peso para que este nicho de mercado específico poida estenderse.
O mandatario ve neste proxecto un motivo para evitar o despoboamento do rural e, polo tanto, fixar poboación, aínda que este pensamento quizais sexa demasiado ambicioso. En todo caso a iniciativa entre Concello e Fundación Galicia Verde debería arrancar con polo menos unha ducia de agricultores.
A entidade encargaríase de presentar un proxecto efectivo e asesorar os participantes. Unha vez que comezase a andar, estudaríase a creación dunha cooperativa que funcionase tamén como comercializadora da produción.
No hay comentarios:
Publicar un comentario