A cooperativa Mar de Arosa consegue os permisos para poñer en marcha a cetaria

Os socios da cooperativa Mar de Arosa de Abanqueiro celebraron unha asemblea na que aprobaron por unanimidade as contas do 2011 e debateron os seus novos proxectos. O máis relevante é a posta en marcha da depuradora e a cetaria de Portomouro, para o que xa contan cos permisos da Xunta e do Concello de Boiro. A construción das instalacións hai tempo que finalizou, se ben está pendente dotalas da maquinaria precisa.

O presidente da entidade, Juan José Dieste, sinalou que a previsión é que a cetaria comece a funcionar a próxima Semana Santa, aínda que todo dependerá de se conseguen unha subvención para tal fin. Recentemente, á cooperativa Ría de Arosa denegáronlles unha axuda para vixilancia.

A intención da entidade de Abanqueiro é comercializar o produto a grande escala. Na asemblea, Juan José Dieste instou os socios a loitar para sortear a crise económica actual, que tamén está a azoutar a este sector produtivo.