A Mancomunidade axusta o seu persoal sen reducir servizos

Os concellos achegarán case o 80% dos 2,5 millóns de euros do presuposto de 2013.

A Mancomunidade Terra de Celanova, entidade conformada polos concellos da Merca, Cartelle, Celanova, Gomesende, Quintela de Leirado, Ramirás, Pontedeva e Verea, presentaba esta semana os presupostos para o exercicio 2013 cun lixeiro incremento respecto ás contas deste ano (2.554.500,18 euros, fronte aos 2.476.437 euros de 2012). ' Os orzamentos tratan de ser os máis axustados posibles', recoñecía o presidente, José Antonio Pérez, que subliñaba o esforzo realizado polo ente para reducir o gasto 'mantendo os servizos'.

As instalacións da Mancomunidad,situadas no barrio da Ermida enCelanova. (Foto: MARCOS ADRO)

A crise económica obrigou a Mancomunidade a realizar unha importante redución do equipo neste 2012, deixando a 61 persoas (fronte ás 78 de hai un ano) para atender os servizos sociais, recollida de lixo, bombeiros, recadación, centro ocupacional e orientación cidadá, entre outros. 'O gasto en persoal estableceuse en 1.567.138,90 euros (fronte aos 1.380.253 de 2012), na partida está incluído o custo de dous obradoiros de emprego, 214.000 euros', explica.

A partida de gastos complétase cos 742.591,74 euros previstos para sufragar os bens correntes e servizos, 140.000 euros para investimentos, seguido dos pasivos financeiros (44.713,47 euros), transferencias correntes (40.000) e gastos financeiros (19.956,07).

No capítulo de ingresos, as maiores achegas procederán dos transferencias correntes doutras administracións (2.298.774,56 euros), transferencias de capital (176.579,81) e taxas, prezos públicos e outros ingresos (78.145,81). Por departamentos, a recollida de lixo segue sendo a actividade máis custosa con 628.000 euros anuais; seguido da atención social (que atende a 47 persoas da Lei de Dependencia e 84 en axuda no fogar) con 625.000 euros e o servizo de bombeiros con 245.206 euros.

Os oito concellos mancomunados, en función de parámetros como a densidade de poboación ou kilometros, soportan o 79,8% do presuposto. O resto corresponde ás achegas da Deputación (215.000 euros, un 8,5%) e da Xunta (300.000 euros, que supoñen o 11,7% do total ).