Maderistas de toda a provincia de Lugo analizan
a posibilidade de sumarse ao proxecto de base cooperativa que promoven os
traballadores de Tablicia para comprar a fábrica de Nadela (Lugo)
e reiniciar a produción nas súas instalacións, paralizadas dende hai meses,
porque a perda deste centro de transformación sería tamén un duro golpe para o
seu negocio.
O presidente do comité de empresa de Tablicia, José Antonio Muiña,
confirmou que hoxe mantivo unha reunión co presidente da Asociación Provincial
de Primeira Transformación da Madeira,Santiago Monteiro, para falar sobre
o proxecto de base cooperativa que están a promover os traballadores.
Nesa reunión, segundo Muiña, o representante dos maderistas lucenses
informou os membros do comité de empresa de que os socios "están
interesados en que Tablicia non peche", porque a desaparición
desa fábrica sería "un gran problema" para o sector da madeira na provincia
de Lugo.
Durante o encontro, Montero informou os delegados de Tablicia de
que "hai un gran número de maderistas, grandes e pequenos, que están
interesados" nese proxecto, polo que o avogado dos traballadores manterá
unha reunión con eles para analizar "fórmulas" que lles permitan
sumarse a esta iniciativa.
"Foi unha primeira toma de contacto, en positivo, porque parece que temos
apoio da gran maioría dos maderistas. A partir de agora, temos convocada
unha nova reunión para luns -día 14-, co noso avogado, para que lles expoña os
pasos que imos dar e eles os comentarán, á súa vez, noutra reunión que teñen o
día 31 con todo o sector", explicou Muiña.
En declaracións a EFE, subliñou que todos os maderistas "están
de acordo en que é un grande hándicap" para o seu sector "queTablicia peche",
porque non terían onde meter practicamente nada do material" que sacan dos
montes.
O equipo de Tablicia, formada por 137 traballadores, aínda agarda noticias
do proceso de liquidación da empresa e da rescisión dos seus contratos, que
depende da autoridade laboral.
De momento, ao redor de oitenta deses traballadores xa expresaron a súa
intención de formar parte da Sociedade Anónima Laboral (S.A.L.) que intentará
comprar a fábrica de Nadela, para reflotar o negocio.
No hay comentarios:
Publicar un comentario