A cooperativa viguesa ‘O Cable Inglés’ recibirá o premio aos
‘Valores Cooperativos 2013’ polo fomento da fórmula cooperativa para atender
novas demandas sociais. Este galardón enmárcase dentro do certame anual dos
Premios á Cooperación 2013, promovido polo Consello Galego de Cooperativas ao
amparo da celebración do Día do Cooperativismo galego. Entregarase este sábado,
6 de xullo, coincidindo coa celebración desta efeméride, que terá lugar nas
instalacións de Feiraco en Pontemaceira, Ames (A Coruña).
Os premios anuais ao cooperativismo pretenden fomentar o
asentamento da cultura cooperativa en Galicia e recoñecen publicamente o
traballo, a innovación e o espírito de cooperación que se leva a cabo en
diferentes ámbitos da economía rexional. O certame premia o traballo de persoas
e entidades no eido do cooperativismo co fin de procurar emprego estable ou
poñer en valor os recursos naturais existentes para favorecer a economía
social.
Esta empresa, creada en 2010, naceu coa idea de dar unha
resposta integral ás demandas culturais propoñendo solucións culturais a
medida, integrando os servizos necesarios para cada experiencia, como
exposicións, xornadas ou festivais de música. Está composta por catro socios e
ofrece apoio para a xestión, produción, comunicación e deseño de proxectos
culturais.
Baixo a fórmula de traballo asociado, dáse resposta a
demandas concretas en fotografía, ilustración, animación, son, artes escénicas,
pedagoxía, tradución ou interpretación, posibilitando un amplo catálogo de
servizos que poden ser contratados de xeito integral ou individualizado polo
cliente.
O Cable Inglés está a traballar en varios proxectos de
índole cultural, como o Tira do Cable, que pretende xuntar historias,
anécdotas, experiencias, documentos, fotografías e filmacións da presenza desta
empresa en Vigo e Galicia. O resultado deste traballo conformará unha
exposición no Museo do Mar da cidade olívica.
Ademais, está a traballar no festival Émundial, que terá
lugar en Vigo en colaboración co Art Institute de Nova York, e que promove a
cultura de lingua portuguesa no estranxeiro. Tamén colaborará co Instituto
Camoes, a casa Galega da Cultura, a Casa das Artes, a Biblioteca Central, o
Museo de arte Contemporáneo e o Centro Municipal de Formación de Novas
Tecnoloxías da Información e Comunicación, para converter esta cidade nun
referente cultural.
No desenvolvemento dos seus proxectos, os socios vinculan o
seu traballo á defensa da lingua e cultura propias, buscando contribuír a
fortalecer o patrimonio cultural galego, dentro e fóra de Galicia, promovendo o
uso desta lingua e fomentado actividades que descubran e potencien a cultura.
A cidade viguesa conta con preto de 120 empresas
cooperativas, mentres que a provincia de Pontevedra suma un total de 324.
No hay comentarios:
Publicar un comentario